Canastota, New York — Isa na namang makasaysayang kabanata sa karera ng pambansang kamao ang naisulat matapos opisyal na itanghal si Manny “Pacman” Pacquiao bilang bahagi ng 2025 batch ng International Boxing Hall of Fame. Ginanap ang seremonya noong Linggo, kung saan si Pacquiao ang pinakahuling ipinakilala sa hanay ng mga pinarangalan — isang tila simbolikong pagpupugay sa kanyang di matatawarang kontribusyon sa mundo ng boksing.
Sa kanyang talumpati, binalikan ni Pacquiao ang kanyang mga natatanging tagumpay sa ring. “Walong dibisyong kampeon, may hawak ng world titles sa loob ng apat na dekada, at ang pinakamatandang welterweight world champion sa kasaysayan,” aniya sa harap ng libo-libong tagahanga at personalidad sa boxing. “Hindi ito basta opinyon. Ito ay mga katotohanan.” Sa kabila ng kanyang kasikatan, hindi pa rin nawawala ang kanyang pagpapakumbaba. Ibinahagi niya kung paanong ang boksing ang naging ilaw niya sa gitna ng kadiliman ng kahirapan. “Ang boksing ang nagsilbing daan ko palabas. Ginawa nitong lakas ang aking paghihirap, naging pangarap ang aking kabiguan, at binigyan ng layunin ang lahat ng sakit na pinagdaanan ko,” ani Pacquiao. “Bawat laban, bawat panalo ay hakbang palayo sa kahirapan. Hindi lang ito para sa akin, kundi para sa aking pamilya, para sa mga Pilipino, at higit sa lahat, para sa Diyos.”
Sa pamamagitan ng isang Instagram post, ipinaabot ni Pacquiao ang kanyang taos-pusong pasasalamat sa mga naging bahagi ng kanyang paglalakbay. “Para kay Jinkee at sa aming mga anak, salamat sa pagmamahal at suporta sa lahat ng tagumpay at kabiguan. Sa mga tagahanga, coaches, media, at bawat taong nanalangin o naniwala sa akin—ito ay tagumpay ninyo rin.” Dagdag pa niya, “Sa mga susunod na henerasyon ng boksingero, huwag hayaang limitahan ng inyong kalagayan ang inyong pangarap. Walang imposible sa Diyos.”
Hindi pa rito natatapos ang kasaysayan ni Pacquiao. Sa edad 46, muling sasabak si Pacquiao sa ibabaw ng lona upang hamunin si Mario Barrios para sa WBC Welterweight title sa darating na Hulyo 19, 2025 sa MGM Grand Garden Arena sa Las Vegas. Bagaman marami ang nagsasabing nararapat na siyang magpahinga, hindi maikakaila ang pagkasabik ng mga tagahanga na muling masilayan sa aksyon ang kanilang idolo. Kasama ni Pacquiao sa batch ng Hall of Fame sina Vinny Paz, Michael Nunn, Yessica Chavez, Mary Jo Sanders, at Anne Sophie Mathis. Pinarangalan din sina Cathy Davis, referee Kenny Bayless, cutman Al Gavin (posthumous), referee Harry Gibbs (posthumous), broadcaster Randy Gordon, television producer Ross Greenburg, Rodrigo Valdez (posthumous), at Owen Swift (posthumous).
Sa buong mundo, si Pacquiao ay hindi lamang isang kampeon kundi isang imahe ng determinasyon, pananampalataya, at kababaang-loob. Ibinandera niya ang galing ng Pilipino sa internasyonal na entablado at binigyang dangal ang mga boksingerong mula sa Pilipinas. Hindi lamang siya lumaban para sa sariling karangalan kundi para sa bayan—isang bagay na bihirang makita sa mga atleta ng kanyang antas. Mula sa pagbebenta ng pandesal at sigarilyo sa lansangan ng General Santos City hanggang sa pagtanggap ng pinakamataas na parangal sa boxing, si Pacquiao ay larawan ng tunay na "rags to riches" na kuwento. Pinatunayan niyang kayang abutin ng isang taong may pangarap ang pinakamataas na tagumpay, gaano man ito kataas, basta't may pananalig at pagsusumikap.
Ang kanyang pananampalataya sa Diyos ay naging pundasyon ng kanyang disiplina at paninindigan. Hindi na bago sa mga tagahanga ang makita si Pacquiao na nananalangin bago at pagkatapos ng laban. Sa bawat suntok, dala niya hindi lang ang lakas kundi ang pananalig. Para kay Pacquiao, hindi lang ito laban ng katawan kundi pati ng puso at espiritu. Dahil sa kanyang tagumpay, naging inspirasyon siya sa mga kabataan, hindi lamang sa larangan ng boksing kundi maging sa pangarap na umangat mula sa kahirapan. Mula sa pagsikat ni Pacquiao, tumaas ang suporta sa Philippine boxing. Dumami ang boxing gyms, naging mas aktibo ang mga amateur tournaments, at maraming kabataang Pilipino ang muling nangangarap maging world champion. Isa na siyang haligi sa pag-usbong ng susunod na henerasyon ng mga boksingero.
Hindi rin maikakaila ang epekto ng kanyang kasikatan sa labas ng boxing ring. Mula sa pagiging kongresista hanggang sa senador, at maging kandidato sa pagkapangulo, patuloy siyang naglilingkod sa kanyang bayan. Bagamat hindi siya nanalo sa kanyang presidential bid, nanatili ang kanyang pagtulong sa mga komunidad sa pamamagitan ng kanyang foundation. Siya'y tinitingala hindi lang bilang atleta kundi bilang isang lingkod-bayan. Bukod sa kanyang natamong mga titulo, kakaiba si Pacquiao sa lahat ng Hall of Famers. Walang sinumang boksingero sa kasaysayan ang nakamit ang kampeonato sa walong magkaibang dibisyon. Isa itong rekord na maaaring hindi na maulit sa kasaysayan. Ang kanyang legacy ay hindi lamang batay sa kanyang panalo kundi sa kanyang kabuuang paglalakbay mula sa wala hanggang maging alamat.
Ngayon na siya’y bahagi na ng Hall of Fame, usap-usapan na maaaring maging coach, promoter, o sports mentor si Pacquiao. Maraming naniniwala na mas makapangyarihan ang kanyang magiging epekto bilang tagapagturo kaysa bilang aktibong manlalaban. Ang kanyang karanasan, determinasyon, at pananampalataya ay kayamanan na maipapasa niya sa susunod na henerasyon. Sa huli, ang pagkaka-induct ni Manny Pacquiao sa International Boxing Hall of Fame ay hindi lang simpleng pagkilala sa kanyang mga nagawa—ito’y pagdiriwang ng kanyang buhay, sakripisyo, at inspirasyon na ibinigay niya sa milyon-milyong Pilipino at tagahanga sa buong mundo. Siya ay hindi lamang boksingero; isa siyang alamat, huwaran, at simbolo ng pag-asa.
0 Comments