DOJ Susuriin ang Ebidensiya sa Umano'y Banta ni VP Duterte

                           Image credit: VP Sara Duterte (Facebook)

Ayon kay Justice Secretary Jesus Crispin Remulla, masusing susuriin ng Department of Justice (DOJ) ang mga ebidensyang isinumite ng National Bureau of Investigation (NBI) upang matukoy kung may sapat na basehan para sa isang preliminary investigation.

Matatandaang ipinatawag ng NBI si Bise Presidente Sara Duterte upang magpaliwanag kaugnay ng umano’y seryosong pagbabanta na kanyang binitiwan.

Nag-ugat ang kontrobersiya mula sa isang livestream noong Nobyembre 2024, kung saan umano’y sinabi ni Duterte na ipapapatay niya sina Pangulong Ferdinand Marcos Jr., Unang Ginang Liza Marcos, at House Speaker Martin Romualdez sakaling may mangyari sa kanya.

Inirekomenda ng National Bureau of Investigation ang pagsasampa ng reklamong grave threats at inciting to sedition laban kay Vice Pres. Sara Duterte kaugnay ng mga umano’y banta niya kina Pres. Bongbong Marcos, First Lady Liza Araneta-Marcos, at House Speaker Martin Romualdez. pic.twitter.com/Sn8Uzofvks

— News5 (@News5PH) February 12, 2025

Mariing itinanggi ni VP Duterte ang paratang, iginiit niyang mali ang naging interpretasyon sa kanyang mga pahayag. Sa isang press briefing noong Pebrero 7, muling nilinaw ng Bise Presidente na hindi siya nagbitiw ng anumang banta laban sa Pangulo.

“Ang live broadcast ay isang bukas na ebidensya. Mayroong Zoom meeting kung saan niya talaga sinabi ang mga pahayag na may pagbabanta,” ayon kay NBI Director Medardo de Lemos.

Dagdag pa ni de Lemos, maaaring magamit ang naturang video bilang pangunahing ebidensya sa kaso, lalo na kung makukumpirma ito ng iba pang testigo o materyales. Ayon sa NBI, patuloy nilang kinakalap ang lahat ng posibleng ebidensya upang mabuo ang isang malinaw na larawan ng insidente.

Samantala, ilang mga kaalyado ni VP Duterte ang nanawagan na itigil na ang imbestigasyon, iginiit nilang bahagi lamang ito ng “political harassment” laban sa Bise Presidente. Anila, ang pahayag ni Duterte ay hindi isang aktwal na banta kundi isang paglalahad ng kanyang saloobin sa kasalukuyang sitwasyon sa pulitika.

Gayunpaman, tiniyak ng DOJ na magiging patas at walang kinikilingan ang kanilang pagsusuri. "Hindi namin maaaring ipagwalang-bahala ang anumang alegasyon, lalo na kung may kinalaman ito sa pambansang seguridad," pahayag ni Secretary Remulla. Dagdag pa niya, magiging batayan sa anumang aksyon ang ebidensya at hindi ang politika.

Source: NEWS5